ຫ້ອງການ ຄະນະກຳມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກ ທີ່ຕົກຄ້າງ ຢູ່ ສປປ ລາວ (ຫຄຊກລ) ແລະ ບັນດາຄູ່ຮ່ວມພັດທະນາ ແລະ ສື່ມວນຊົນໄດ້ເດີນທາງຢ້ຽມຢາມ ແຂວງຊຽງຂວາງຢ່າງເປັນທາງການ

Published on 2021-04-07

ຫ້ອງການ ຄະນະກຳມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກ ທີ່ຕົກຄ້າງ ຢູ່ ສປປ ລາວ (ຫຄຊກລ) ແລະ ບັນດາຄູ່ຮ່ວມພັດທະນາ ແລະ ສື່ມວນຊົນໄດ້ເດີນທາງຢ້ຽມຢາມ ແຂວງຊຽງຂວາງຢ່າງເປັນທາງການໃນ ວັນທີ 31 ມີນາ - 1 ເມສາ 2021. ຈຸດປະສົງຂອງການຢ້ຽມຢາມດັ່ງກ່າວແມ່ນຢາກໃຫ້ປະເທດຄູ່ຮ່ວມພັດທະນາ ຮັບຮູ້ ແລະ ເຂົ້າໃຈສະພາບບັນຫາການຕົກຄ້າງຂອງລະເບີດຢູ່ທ້ອງຖິ່ນ ແນໃສ່ເປັນການລະດົມຂົນຂວາຍທຶນໃໝ່ຈາກບັນດາປະເທດຜູ້ໃຫ້ທຶນຕ່າງໆ ເຂົ້າໃນວຽກງານແກ້ໄຂບັນຫາລະເບີດບໍ່ທັນແຕກ ທີ່ຕົກຄ້າງຢູ່ ສປປ ລາວ ໃຫ້ຫຼາຍຂຶ້ນຕື່ມ ເປັນການປະກອບສ່ວນເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ເປົ້າໝາຍພັດທະນາແບບຍືນຍົງທີ 18 ແລະ ແຜນການລຶບລ້າງຄວາມທຸກຍາກ.

          ໃນຕອນບ່າຍຂອງ ວັນທີ 31 ມີນາ 2021, ທ່ານ ປະເດີມພອນ ສົນທະນີ, ຮອງລັດຖະມົນຕີ ຮສສ ພ້ອມດ້ວຍບັນດາທ່ານເອກອັກຄະລັດຖະທູດ,​ ທຸຕານຸທູດ ຂອງປະເທດຄູ່ຮ່ວມພັດທະນາ ໄດ້ເຂົ້າຢ້ຽມຂ່ຳນັບ ທ່ານ ບຸນຈັນ ສີວົງພັນ ເຈົ້າແຂວງ ແຂວງຊຽງຂວາງ ທີ່ຫ້ອງຮັບແຂກຂອງຫ້ອງວ່າການປົກຄອງແຂວງ. ໃນຕອບບ່າຍຂອງວັນດຽວກັນ, ຄະນະຢ້ຽມຢາມໄດ້ເຂົ້າຢ້ຽມຊົມທົ່ງໃຫ້ຫີນ ມໍລະດົກໂລກແຫ່ງທີ 3 ຂອງ ສປປ ລາວ. ເຊິ່ງພະແນກຖະແຫຼງຂ່າວ, ວັດທະນາທຳ ແລະ ທ່ອງທ່ຽວ ໄດ້ໃຫ້ການຕ້ອນຮັບ.

ໃນຕອນເຊົ້າຂອງ ວັນທີ 1 ເມສາ 2021, ມີກອງປືກສາຫາລືແນະການລົງພາກສະໜາມຕົວຈິງທີ່ໂຮງແຮມອານຸລັກແຄນລາວ ເປັນປະທ່ານໂດຍ ທ່ານ ປະເດີມພອນ ສົນທະນີ, ຮອງລັດຖະມົນຕີ ຮສສ. ໃນມື້ດຽວກັນ, ຄະນະໄດ້ລົງຢ້ຽມຢາມສະໜາມກວດກູ້ ແລະ ທໍາລາຍລະເບີດ ບ້ານລາດບວກ, ເມືອງແປກ ຂອງໂຄງການເກັບກູ້ລະເບີດແຫ່ງຊາດ (ຄກລ) ແຂວງຊຽງຂວາງ. ທ່ານ ບຸນພະມິດ ໂສມວິຈິດ ອຳນວຍການ ຄກລ ໄດ້ກ່າວລາຍງານສະພາບໂດຍຫຍໍ້ຂອງສະໜາມດ່ັງກ່າວ ແລະ ຄະນະໄດ້ຊົມການທຳລາຍລະເບີດ. ຫຼັງຈາກນັ້ນ, ໄດ້ສືບຕໍ່ຢ້ຽມຢາມການຈັດຕັ້ງປະຕິບັດວຽກງານໂຄສະນາສຶກສາຄວາມສ່ຽງຈາກ ລບຕ ບ້ານລາດບວກ, ເມືອງແປກ ແລະ ພົບປະກັບຜູ້ຖືກເຄາະຮ້າຍຈາກລະເບີດ. ພາຍຫຼັງການຢ້ຽມຢາມ ຄະນະໄດ້ເຂົ້າຮ່ວມກອງປະຊຸມສະຫຼຸບຜົນສຳເລັດຂອງການຢ້ຽມຢາມໃນຄັ້ງນີ້ທີ່ໂຮງແຮມອານຸລັກແຄນລາວ.