ຝຶກອົບຮົມກ່ຽວກັບການຄຸ້ມຄອງຂໍ້ມູນຂ່າວສານ ລບຕ ໃຫ້ກອງກວດກູ້ລະເບີດ ເພື່ອມະນຸດສະທໍາກອງທັບ 58.
Published on 26/08/2024
ຫ້ອງການ ຄະນະກໍາມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກ ທີ່ຕົກຄ້າງ ຢູ່ ສປປ ລາວ ໄດ້ຈັດຝຶກອົບກ່ຽວກັບການຄຸ້ມຄອງຂໍ້ມູນຂ່າວສານ ລບຕ ໃຫ້ກອງກວດກູ້ລະເບີດເພື່ອມະນຸດສະທໍາກອງທັບ 58 ໃນລະຫວ່າງວັນທີ 26-30 ສິງຫາ 2024 ຢູ່ເມືອງວັງວຽງ ແຂວງວຽງຈັນ ໂດຍການເປັນປະທານຮ່ວມ ຂອງທ່ານ ບຸນເພັງ ສີສະຫວັດ ຮັກສາການຫົວໜ້າຫ້ອງການ ຄຊກລ ແລະ ທ່ານ ພັທ. ພອນແກ້ວ ອໍລະດົມ, ຫົວໜ້າການທະຫານ ກອງກວດກູ້ລະເບີດ ເພື່ອມະນຸດສະທຳ ກອງທັບ 58 ຈຸດປະສົງຂອງການຝຶກອົບຮົມຄັ້ງນີ້, ເພື່ອສ້າງຂີດຄວາມສາມາດ ໃຫ້ກອງກວດກູ້ເພື່ອມະນຸດສະທໍາກອງທັບ 58 ກ່ຽວກັບການລາຍງານ ການຈັດຕັ້ງປະຕິບັດພາກສະໜາມ ທີ່ນໍາໃຊ້ລະບົບອອນລາຍ ໂດຍນໍາໃຊ້ໂປຣແກັມ Survey 123. ການຝຶກອົບຮົມໃນຄັ້ງນີ້, ໜ່ວຍງານຄຸ້ມຄອງຂໍ້ມູນຂ່າວສານ ຍັງໄດ້ນໍາເໜີ ການຄຸ້ມຄອງຂໍ້ມູນ ແລະ ໂປຣແກັມ ArcGIS online ແລະ Survey 123 ຂັ້ນພື້ນຖານ, ແນະນຳແບບຟອມເກັບກຳຂໍ້ມູນ ຄວາມຄືບໜ້າປະຈໍາເດືອນ, ການສໍາຫຼວດບໍ່ແມ່ນແບບວິຊາການ (NTS), ການສໍາຫຼວດ ວິຊາການ (TS), ການກວດກູ້ (AC), ການທໍາລາຍເຄື່ອນທີ່ (RT) ແລະ ແບບຟອມເກັບກໍາຂໍ້ມູນ ການໂຄສະນາ ສຶກສາຄວາມສ່ຽງໄພຈາກ ລບຕ (EORE) ການເກີດອຸບັດເຫດ, ຜູ້ຖືກເຄາະຮ້າຍ ແລະ ການຊ່ວຍເຫຼືອ (Accident / victim and Victim assistance).