ກອງປະຊຸມຂະແໜງການແກ້ໄຂບັນຫາລະເບີດບໍ່ທັນແຕກ ທີ່ຕົກຄ້າງ ຢູ່ ສປປ ລາວ ຄັ້ງທີ 02 ປະຈຳປີ 2024
Published on 02/11/2024
ກອງປະຊຸມຂະແໜງການແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ ຈັດຂື້ນໃນຕອນບ່າຍ ວັນທີ 01 ພະຈິກ 2024 ທີ່ຜ່ານມານີ້, ໂດຍການເປັນປະທານຮ່ວມ ຂອງທ່ານ ໂພໄຊ ໄຂຄຳພິທູນ, ຮອງລັດຖະມົນຕີ ກະຊວງການຕ່າງປະເທດ, ຮອງປະທານ ຜູ້ປະຈໍຳການ ຄຊກລ, ທ່ານ ນາງ Martine Thérer , (ມາຕິນ ເຕຼເຣີ), ຜູ້ຕາງໜ້າອົງການ ສປຊ ເພື່ອການພັດທະນາ ປະຈໍາ ສປປ ລາວ ແລະ ທ່ານ ນາງ Heather Variava, (U.S. Ambassador) ເອກອັກຄະລັດຖະທູດ, ສະຖານທູດສະຫະລັດອາເມລິກາ ປະຈໍາ ສປປ ລາວ, ພ້ອມມີບັນດາເອກອັກຄະລັດຖະທູດ, ທູຕານຸທູດ, ຜູຕາງໜ້າຈາກອົງການ ສປຊ ເພື່ອການພັດທະນາ, ຜູ້ອຳນວຍການ ແລະ ຕາງໜ້າຈາກອົງການປະຕິບັດງານແກ້ໄຂບັນຫາ ລບຕ ເພືີ່ອມະນຸດສະທໍາ ແລະ ອົງການປະຕິບັດງານພາກວິສາຫະກິດ, ຂະແໜງການກ່ຽວຂ້ອງອ້ອມຂ້າງສູນກາງ, ແຂວງ, ເຂົ້າຮ່ວມ. ກອງປະຊຸມຄັ້ງນີິ້ ໄດ້ຮັບທຶນສະໜັບສະໜຸນຈາກ ອົງການ ກອຍກາ ໂດຍຜ່ານອົງການ ສະຫະປະຊາຊາດ ເພື່ອການພັດທະນາ ປະຈຳ ສປປ ລາວ. ກອງປະຊຸມໄດ້ ສະຫຼຸບຜົນສຳເລັດຕົ້ນຕໍຕົວເລກການຈັດຕັ້ງປະຕິບັດວຽກງານໃນຂະແໜງການແກ້ໄຂບັນຫາ ລບຕ ນັບແຕ່ ເດືອນ ມັງກອນ ເຖິງ ຕຸລາ 2024. ທ່ານ ບຸນເພັງ ສີສະຫວັດ ຫົວໜ້າຫ້ອງການ ຄຊກລ ກ່າວວ່າ: ນັບຕັ້ງແຕ່ ຕົ້ນປີ ຫາເດືອນ ຕຸລານີ້, ການກວດກູ້ເນື້ອທີ່ດິນໄດ້ທັງໜົດ 5,276 ກວ່າເຮັກຕາ, ໄດ້ທໍາລາຍລະເບີດບໍ່ທັນແຕກທີ່ຕົກຄ້າງ ຈໍານວນ 71,875 ກວ່າໜ່ວຍ; ໃນນີ້ລະເບີດລູກຫວ່ານ (ບົມບີ) ຈໍານວນ 53,026 ກວ່າໜ່ວຍ; ສໍາລັບວຽກງານການໂຄສະນາສຶກສາຄວາມສ່ຽງໄພຈາກ ລະເບີດບໍ່ທັນແຕກ ທີ່ຕົກຄ້າງ ແມ່ນສາມາດເຄື່ອນໄຫວໂຄສະນາໄດ້ຈໍານວນ 970 ກວ່າບ້ານ; ການເກີດອຸປະຕິເຫດທັງໝົດ 25 ຄັ້ງ (ມີຜູ້ໄດ້ຮັບເຄາະຮ້າຍຈາກ ລບຕ 48 ຄົນ, ໃນນັັ້ນ ເສຍຊີວິດ 09 ຄົນ, ຜູ້ບາດເຈັບ 39 ຄົນ), ການຊ່ວຍເຫຼືອຜູ້ຖືກເຄາະຮ້າຍຈາກ ລະເບີດບໍ່ທັນແຕກ ທີ່ຕົກຄ້າງ ຈໍານວນ 1,939 ກວ່າຄົນ ເປັນຍິງ 353 ຄົນ.; ການສໍາຫຼວດບໍ່ແມ່ນວິຊາການ ຈໍານວນ 211 ກວ່າບ້ານ; ການສຳຫຼວດທາງດ້ານວິຊາການ ຈໍານວນ 314 ກວ່າບ້ານ ແລະ ເນື້ອທີ່ຢືນຢັນວ່າມີຜົນກະທົບຈາກລະເບີດລູກຫວ່ານ ຈໍານວນ 19,820 ກວ່າເຮັກຕາ. ແຜນບູລິມະສິດໃນການແກ້ໄຂລະເບີດບໍ່ທັນແຕກໃນ ປີ 2025 ຂອງ ສປປ ລາວ ແມ່ນຈະເນັ້ນໃສ່ການ ເຜີຍແຜ່ຄວາມຮູ້ ແລະ ຄວາມອັນຕະລາຍຂອງລະເບີດຜ່ານ ວິທະຍຸກະຈາຍສຽງ ແຂວງ, ຂະຫຍາຍຕາໜ່າງ ການຊ່ວຍເຫຼືອ ຜູ້ເຄາະຮ້າຍ ໃນແຂວງ ທີ່ສຳຄັນ. ຄວາມພະຍາຍາມດັ່ງກ່າວ ຍັງລວມມີການປັບປຸງລະບົບຂໍ້ມູນ, ກອງປະຊຸມການປົກຄອງ ແລະ ການປະຕິບັດຕາມສົນທິສັນຍາຫ້າມລະເລີດລູກວ່ານ, ເຄື່ອງມືເກັບກູ້ທີ່ມີຄວາມທັນສະໄໝ, ການຝຶກອົບຮົມນັກວິຊາການ, ກະກຽມຄວາມພ້ອມການເປັນປະທານການທົບທວນຄັ້ງທີ 3 ຂອງ ລັດພາຄີສົນທິສັນຍາວ່າດ້ວຍການເກືອດຫ້າມລະເບີດລູກຫວ່ານ, ພັດທະນາລະບົບການຄຸ້ມຄອງຂໍ້ມູນຂ່າວສານ ໂດຍນຳໃຊ້ IMSMA Core, ຫໍສະໝຸດດິຈິຕອນ ແລະ ລະບົບແລກປ່ຽນຂໍ້ມູນແບບອິເລັກໂຕນິກຢູ່ພາຍໃນຫ້ອງການ ຄຊກລ ແລະ ລະບົບການຄຸ້ມຄອງຂໍ້ມູນຂ່າວສານທີ່ມີຄວາມເຂັ້ມແຂງເພື່ອຈະເສີມຂະຫຍາຍຄວາມປອດໄພຈາກລະເບີດບໍ່ທັນແຕກ ໃນທົ່ວປະເທດລາວ. ໃນຕອນທ້າຍກອງປະຊຸມ ທ່ານປະທານ ມີບາງຄໍາເຫັນ ເພືີ່ອເປັນແນວທາງພື້ນຖານໃຫ້ແກ່ຂະແໜງການ ລບຕ ດັັ່ງນີ້: ໃຫ້ບັນດາພາກສ່ວນທີ່ກ່ຽວຂ້ອງສືບຕໍ່ເຜີຍແຜ່ຂໍ້ມູນເພື່ອຊຸກຍູ້ໃຫ້ບັນດາຂະແໜງການທີ່ກ່ຽວຂ້ອງ ເອົາງົບປະມານການ ສຳຫຼວດ-ກວດກູ້ ເຂົ້າໃນແຜນໂຄງການພັດທະນາພື້ນຖານໂຄ່ງລ່າງ ເພື່ອຮັບປະກັນວ່າທຸກ ພື້ນທີ່ໄດ້ຮັບການສຳຫຼວດ-ກວດກູ້ ກ່ອນລິເລີ່ມໂຄງການພັດທະນາຕ່າງໆ.