ກອງປະຊຸມ ຄະນະຊີ້ນຳໂຄງການຮ່ວມມື ເພື່ອສ້າງຄວາມເຂັ້ມແຂງໃນການແກ້ໄຂບັນຫາ ລບຕ ຢູ່ ສປປ ລາວ ເພື່ອບັນລຸເປົ້າໝາຍພັດທະນາແບບຍືນຍົງທີ 18 (SDG 18) ແລະ ເສັ້ນທາງກ້າວສູ່ຄວາມປອດໄພ III (SPF III) ປະຈໍາປີ 2024
Published on 23/07/2024
ກອງປະຊຸມຄະນະຊີ້ນໍາໂຄງການຄັ້ງແລກຂອງປີ 2024 ຂອງຂະແໜງການແກ້ໄຂບັນຫາລະເບີດບໍ່ທັນແຕກ ທີ່່ຕົກຄ້າງ ຢູ່ ສປປ ລາວ ຈັດຂຶ້ນໃນວັນທີ 19 ກໍລະກົດ 2024 ທີ່ໂຮງແຮມສຸພັດຕຣາ ນະຄອນຫຼວງວຽງຈັນ ພາຍໃຕ້ການເປັນປະທານຂອງ ທ່ານ ໂພໄຊ ໄຂຄຳພິທູນ, ຮອງລັດຖະມົນຕີ ກະຊວງການຕ່າງປະເທດ ຮອງປະທານ ຜູ້ປະຈຳການ ຄຊກລ ແລະ ປະທານຮ່ວມ ທ່ານ ນາງ ມາຕິນ ເຕຼເຣີ (Martine Therer), ຜູ້ຕາງໜ້າອົງການ ສະຫະປະຊາຊາດ ເພື່ອການພັດທະນາ ປະຈໍາ ສປປ ລາວ ມີຜູ້ເຂົ້າຮ່ວມຈາກ ຄະນະຊີ້ນໍາໂຄງການ, ບັນດາທູຕານຸທູດ, ຕາງໜ້າປະເທດຜູ້ໃຫ້ທຶນ, ຄູ່ຮ່ວມພັດທະນາ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມແບບເຊິ່ງໜ້າ ແລະ ຜ່ານລະບົບທາງໄກ. ກອງປະຊຸມຄັ້ງນີິ້ ໄດ້ຮັບທຶນສະໜັບສະໜຸນຈາກ ອົງການ ກອຍກາ ໂດຍຜ່ານອົງການ ສະຫະປະຊາຊາດ ເພື່ອການພັດທະນາ ປະຈຳ ສປປ ລາວ. ກອງປະຊຸມຄັ້ງນີ້ ທ່ານ ບຸນເພັງ ສີສະຫວັດ ຮັກສາການ ຫົວໜ້າຫ້ອງການ ຄຊກລ ໄດ້ລາຍງານສະພາບລວມ ແລະ ຜົນງານທີ່ພົ້ນເດັ່ນໃນການຈັດຕັ້ງປະຕິບັດໃນໄລຍະ 6 ເດືອນທີ່ຜ່ານມາ ແລະ ແຜນວຽກຈຸດສຸມໃນຕໍ່ໜ້າ ເຊິ່ງໄລຍະຜ່ານມາ ສໍາເລັດການປະຊຸມທົບທວນມາດຕະຖານແຫ່ງຊາດ, ຮ່າງເອກະສານຈັດບູລິມະສິດສຳລັບການເກັບກູ້, ລົງຕິດຕາມຊຸກຍູ້ ອົງການປະຕິບັດງານ, ດຳເນີນການທຳລາຍສຸກເສີນຮ່ວມກັບກອງ 58, ໂຄງການໂຄສະນາຜ່ານວິທະຍຸ 10 ແຂວງ ການໂຄສະນາສຶກສາຄວາມສ່ຽງໄພຈາກ ລບຕ, ລົງຕິດຕາມຊ່ວຍເຫຼືອຜູ້ຖືກເຄາະຮ້າຍຈາກ ລບຕ ເປັນຕົ້ນ. ພ້ອມທັງລາຍງານແຜນຈຸດສຸມໃນໄຕມາດ 3 ແລະ ໄຕມາດ 4 ງົບປະມານ ແລະ ສິ້ງທ້າທາຍຕ່າງໆ. ນອກນັ້ນ, ກອງປະຊຸມໄດ້ສະຫຼຸບຕີລາຄາຄືນຜົນການຈັດຕັ້ງປະຕິບັດໄລຍະ 6 ເດືອນຜ່ານມາ ຂອງກອງ 58, ຄກລ ແລະ ທິດທາງແຜນການ 6 ເດືອນທ້າຍປີ, ພ້ອມຮັບຟັງລາຍງານການຈັດຕັ້ງປະຕິບັດໂຄງການຈາກ ອົງການ ສປຊ ເພື່ອການພັດທະນາ ປະຈຳ ສປປ ລາວ ພ້ອມທັງປະກອບຄຳຄິດເຫັນຕໍ່ກັບບັນຫາ, ສິ່ງທ້າທາຍ ແລະ ບັນດາຂໍ້ສະເໜີຕ່າງໆ, ກອງປະຊຸມໄດ້ປຶກສາຫາລື ພ້ອມກັນແລກປ່ຽນຄໍາຄິດເຫັນ ແລະ ສະແດງທັດສະນາກ່ຽວກັບການແກ້ໄຂບັນຫາລະເບີດບໍ່ທັນແຕກ. ໃນຕອນທ້າຍ ກອງປະຊຸມທ່ານປະທານຮ່ວມໄດ້ສະຫຼຸບສັງລວມຜົນຂອງກອງປະຊຸມ ແລະ ທ່ານປະທານໄດ້ມີຄຳເຫັນ ແລະ ທິດຊີ້ນຳຂອງກອງປະຊຸມເພື່ອໃຫ້ຫ້ອງການ ຄຊກລ, ກອງ 58 ແລະ ຄກລ ສືບຕໍ່ຈັດຕັ້ງຜັນຂະຫຍາຍໃຫ້ສຳເລັດ ຕາມແຜນປະຈຳ 06 ເດືອນທ້າຍປີ ເຊິ່ງໄດ້ມີທິດຊີ້ນຳຄື: ໃຫ້ທຸກພາກສ່ວນໃສ່ໃຈຈັດຕັ້ງປະຕິບັດກິດຈະກຳຕາມແຜນທີ່ວາງໄວ້ ໃຫ້ສືບຕໍ່ທົບທວນປັບປຸງມາດຕະຖານແຫ່ງຊາດ, ພັດທະນາເອກະສານ, ພ້ອມທັງໃຫ້ບັນດາກະຊວງທີ່ກ່ຽວຂ້ອງສືບຕໍ່ຮ່ວມກັບຂະແໜງການແກ້ໄຂບັນ ລບຕ ເພື່ອສຸມໃສ່ຈັດຕັ້ງປະຕິບັດ ແຕ່ລະກິດຈະກຳ ເປັນຕົ້ນກະຊວງສຶກສາທິການ ແລະ ກິລາ, ກະຊວງຖະແຫຼງຂ່າວ, ວັດທະນາທຳ ແລະ ທ່ອງທ່ຽວ ສືບຕໍ່ໂຄສະນາຜ່ານວິທະຍຸ ແລະ ໂທລະໂຄງ ແລະ ສື່ທາງອອນລາຍ, ພັດທະນາຫຼັກສູດເຂົ້າໃນການສຶກສາ. ກະຊວງສາທາລະນະສຸກສືບຕໍ່ປິ່ນປົວ ຊ່ວຍເຫຼືອຜູ້ຖືກເຄາະຮ້າຍຈາກ ລບຕ. ຖ້າຫາກວ່າ ຂະແໜງການແກ້ໄຂບັນຫາ ລບຕ ບໍ່ສາມາດທີ່ຈະແກ້ໄຂໄດ້ ແມ່ນຂໍໃຫ້ຮີບຮ້ອນລາຍງານ ຂໍທິດຊີ້ນຳເພື່ອແກ້ໄຂ ບໍ່ໃຫ້ປະປ່ອຍໄວ້ເປັນບັນຫາຊ້ຳເຮືອ ແລະ ແກ່ຍາວ. ນອກຈາກນີ້, ຂໍໃຫ້ສືບຕໍ່ປັບປຸງ ຍົກສູງຄຸນນະພາບຂອດການປະສານງານ ແລະ ສ້າງຄວາມອາດສາມາດໃຫ້ພະນັກງານຂັ້ນທ້ອງຖີ່ນເພື່ອປະກອບສ່ວນຈັດຕັ້ງປະຕິບັດວຽກ ງານແກ້ໄຂບັນຫາ ລບຕ ໃຫ້ມີຄວາມໂລ່ງລ່ຽນ ແລະ ຄ່ອງແຄ້ວກວ່າເກົ່າ. ການປັບປຸງການປະສານງານລະຫວ່າງພາກສ່ວນ ຕ່າງໆ ເປັນສິ່ງສໍາຄັນເພື່ອໃຫ້ການຈັດຕັ້ງປະຕິບັດກິດຈະກໍາສາມາດບັນລຸຜົນຕາມແຜນທີ່ໄດ້ວາງໄວ້ໃຫ້ມິປະສິດທິພາບ.